| Главная » Статьи » Ногайские стихи |
Ногайские частушки
| ----------------- МУСЛИМАТ КУБАНОВА ТЕК САГА ДЕП ЙЫРЛАЙМАН Терезединъ туьбинде Тизуьв-тизуьв сарымсак. Сен андасынъ, мен мундаман, Не этермиз, сагынсак. Кара костюм, кара ыстан Кийдирермен, аьруьвим, Кара ерге кирге дейим Суьйдирермен, аьруьвим. Шемиданнынъ туьбинде, Эки метр харым бар. Сен билмейсинъ, аьруьв яс, Меним ашыкярым бар. Коьк коьйлегим бар дейсинъ, Куьнде неге киймейсинъ? Сыпатынънан билемен: Алдынгындай суьймейсинъ. Аданаска тиккен коьйлек, Явырыны тар болады. Эки суьйген бир-бирине Талпынады, заьр болады. Юрек сырым тоькпеге Киси таппай, йырлайман. Йырларымды тынъласанъ, Анъларсынъ деп, ойлайман. Ишимдеги сырларымды Тек сага деп шынълайман. Макул коьрсенъ ойларымды, Явабынъды тынълайман. Ян ювыгым келер деп, Оьзеленип саклайман. Ян-шырагым келмесе, Уьй айланып йылайман. Пишеншалга барады, Эрте турып дорогой. Дорогойга буйрык берсем, Дорогойым-«заводной». Неге бардым сага деп, Оькинемен соьле де. Коьрмеген болсам сени Болмас эди баьле де. Агашка бардым, балта алып, Кесермекен, дорогой. Келеш энди ойланайык, Балтадай батып калайык. Неге бардым мен сага, Яслыгымда алданып. Оьтти меним яшавым, Давалыкта ялданып. КЕТПЕЙСИНЪ СЕН ЭСИМНЕН Кетпейсинъ сен эсимнен Эш таймайсынъ туьсимнен. Ялашылар, яла ягып, Айырдылар, ах, сеннен. Алты куьннен бербетин Сув ишпеймен авызга. Ак юректен ашувлыман Сосы наьлет инсанга. Юрдинъ меним артымнан, Коьп баьпишлер тоздырып, Соьйлегенде, ойламай, Айтканынъды оздырып. Астынъдагы – торы ат, Минип ога юртагы. Конъысынъа ашык эттинъ, Алып оны туртагы. Яслыгымда алдатып, Коьп сербет сув иширдинъ, Суьемен деп суьйдирип, Алып мени, йибердинъ. Экевмизди айырганнынъ Эки коьзи юмылсын. Мени суьймей, куьнлегеннинъ Соьйлер тили тыйылсын. Куьнши келсе уьйинъе, Сен еринънен тур да каш. Туврашылга, алалга Эсигинъди керип аш. Уьзилмесин ырызкынъ, Берекетинъ коьп болсын. Конак келсе уьйинъе, Аш курсагы ток болсын. Куьндес деген яман-ав, Куьндиз шырак яктырар. Тили кеншек картлыкта Коьзясынъды актырар. Шабаз авылы. | |
| Категория: Ногайские стихи | Добавил: BAD_BOY25 (02 Мая 2012) | |
| Просмотров: 4871 |
| Всего комментариев: 0 | |