Главная » Статьи » Ногайские сказки

---

АЖДАУТ НАЙМАНОВ СОГАН Сыйлы казан асаяк болып аьзирленеди. Медине ога ярдам этеек болып, соганды баска пешке аькетип, аьесиннен ясырып аршыйды. Ол туьптеги пештен коьзясланып шыгады. -Сени ким сокты? Неге йылайсынъ? – деп Сыйлы оны кушагына алады. -Мен йыламайман, коьзлерим йылайды, – дейди Медине. ГЕОМЕТРИЯ ДЕРИСИНДЕ Айсе уьйге берилген теоремады айталмайды эм окытувшы кайкалаган экев салды. -Данъклы математик Миньковский бир теоремады сав йыл шешкен, а уьйкен Фарадей электромагнитный индукциядынъ барын ети йыл излеген. А сиз келесинъиз де бес-алты такыйкадынъ ишинде мага сондай авыр теоремады айттыраяк боласыз, – деп Айсединъ хатери калады. КУЬНАЙЛАН Орамда Айсе куьнайлан шертип туры. Динислам колын созып: -Куяш ийги этип – дейди. Кыз ога биртоьнекей шемишке береди. -У-у, кызганшак! -Ыйнанмасанъ кел кара. Йок –деп Айсе кисесин актарып коьрсетеди. -Кызганшаклар! Билемен мен сизди! Бизде куьнайлан йоктай коьресинъма? Табан толган! Сиз, ятарбеклер, кеше пуф деп уйклаган уьшин, биз папа экевимиз кешелер мен йыямыз. -Бар экен, талавга шертпей турасынъ? -Биз оны соьле шыгармаймыз. Омаса билип олтыраяклар. Кыста сувырып май эттиреекпиз. Сол заманда кувырсам, коьрерсинъ оьзек сага берсем! КАЛАДАН КЕЛГЕН КЫЛЫПЛЫ СЕПЕР Балалар орамда ойнайдылар. Касларына калада окыйтаган Сепер келеди. Ол Динисламга айтады: - Твоя бабушка-колобок дала мне паровоз, а твой пузатый папа подарил мне автомат, а усатый дед – пистолет. - Сен бизге кардаш боласынъма? - Ну да. - Кел аьше кушакласаяк. Олар кушакласадылар, оьбиседилер. Экевининъ де колында бирер китап барн. - Сеники сейирлиме? - О корабликах. А твоя? - Самолетлар акында. Кел авыстыраяк. - Лучше давай мы подарим их друг другу. Так будет человечнее. - Айташта, сен ногайша коьтере билмейсинъме? - Неге билмейди? Биз интернатта ногайша окыймыз да. Сени орысша уьйретеек боламан. ЯСИН Динислам: -Соьле каникулдасынъма? -Аьше. -Четвертнойларынъ аьруьвим? -Осал... баьриси де доьртев. Олардынъ касына кишкенекей Ясин келеди: -Сепер, папанъ кайда куллык этеди? -Вытрезвилкада. АЬЕМШЕШЕЙ Март айы бир арба куллык алып келеди авылга. Найнай урдан шыгарган ералмасын сайлыбастырып туры. -Хайырлы аягым ман келдим! –деп келеди кишкенекей Асият. Ол янме-ян пишеге ярдам этип баслайды. Кыз бир аьлемет ералма табады. -Мунавы турган бир От-Аскер экен! Басындагы боьрки яман уьйдинъ ожагындай шайкалган, туьспеге туры. Мыйыклары бузлы сувга туьскен мысыктынъ куйрыгындай терейген. Бурыны десенъ ералмадай. Куьлкиси сав авылды силтедей тындырады. Коьзлериннен от шыгады. -Сен турган бир аьемшешей экенсинъ – деп завыкланады Найнай. РФ язувшылар Союзынынъ агзасы.

Категория: Ногайские сказки | Добавил: BAD_BOY25 (03 Мая 2012)

Просмотров: 1859

Всего комментариев: 0