Согъушкъа достларым, хакъ татар тиличюн! 
Батыда, тувушта унтулгъан коптен, 
Кевдеси къалын бек, тамыры дерен… 
Къарт Татар тилининъ мен кордим анынъ, 
Мен тувгъан баласы, ольмеген джаны. 

Мен онынъ сесинден уйяндым энди, 
Не беймен мен энди, не залым эфенди, 
Мен татар кедайман, тилимнинъ къулу, 
Тилимде джашагъан джигитлер улу… 

Джигитлер, оларнынъ сезлери ярлыкъ, 
Адларын унутмай Тюрклюк, Татарлыкъ… 
Бир кече тюшь кордым бир татар уйюнде, 
Тамырын таптым бир чин Казан койюнде… 

Конлюмде къайнагъан, башымда тувгъан, 
Башымны сыйпагъан, козюмни джувгъан 
Дуйгулар, ойларым Араптан узакъ, 
Аджемге кулюнч пек, ходжагъа къазакъ… 

Тек Татар тилинде озюме къайтым, 
Сырымны, конлюмни бу тильде айтым… 
Тередий тугульмен сой-сопум белли, 
Бу джолда не къадар къарт кедай кельди… 

Неваи пиримдир, кедайлар башы, 
Татарджа джырлагъан бир татар джашы, 
Токъайлар къардашым, бир багъча гулю, 
Менимки конлю, менимки тили… 

Токъайгъа къардашлар, Токъайгъа турмай. 
Бизлерге джетишир Неваи, Токъай… 
Истамбул, билимен «Тефрикъа!» дийджек, 
Арапнъынъ, Аджемнинъ устюне титреджек. 
Истанбул, тюрк тилин батырды, бувды… 
Тюрклюкни унутты, Тюрк джырын кувды… 

Истанбул, себеби сакъавлыкънынъ 
Бизлерни чирмагъанъ бу анкъавлыкънынъ… 
Истанбул бир леке, акъ манлаймызда 
Истанбул къаралыкъ кюн, айымызда… 

Керекмий бизлерге не меркез, орта, 
Истанбул менимдже эр Татар «йорта»… 
Къаерде айтылса Неваи тили, 
Къаерде дуюлса Токъайнынъ кенли 
Охшасы бир изгю «Акъ топракъ» бизге, 
О ерде олейик тюркюли, куле… 

Анайи остюре «Ай нени» чалып, 
Къарт, джаныкъ джырларман конюлим алып, 
Оскенсон уйрене, джат джырлар, бала… 
Анайнынъ джырлары бешикте къала… 

Бу джырлар, тилегим, бешиктен турсын, 
Мектепке, китапкъа, шеэрге кирсин … 
Бешикте эшитийик биринджи сесин, 
Салагъач устюнде мезаргъа кельсин. 

Тувгъанда баламан ойсуз, фикирсиз, 
Ольгенде татарман, боламан джырсыз… 
Айтмадым букюнгеч бир эрен беклеп, 
Танрыдан Неваи, Дженгизлер тилеп… 

Согъушлар сырасы кельди де кече… 
Тувмады бир менден яхшыракъ кендже, 
Къошуным, достларым азгъана болса да, 
Кюн-кюнден элиме турлю джат толса да, 

Батырлыкъ баш керек, башымни сильктим, 
Тиль, конюль джавына къылычым чектим: 
«Согъушкъа достларым, хакъ Татар тиличюн! 
Согъушкъа, тувгъанлар, керекчи Эльичюн!». 
Бекир Чобанзаде.